廣東話兒歌童謠

細個嗰陣時常聽阿媽唱嗰啲兒歌，好容易上口，唱起上嚟亦開心。最常聽到的有〝小朋友〞、〝有隻雀仔跌落水〞、〝打開蚊帳〞等。另外亦有耳熟能詳嘅廣東話兒歌〔童謠〕如〝凼凼轉，菊花園〞、〝月光光，照地堂〞、〝排排坐，食粉果〞等等。響網上收集唔少呢咐廣東話童謠，有好多係熟口熟面，亦有唔熟或者唔識嘅，不過都好得意好好玩。有啲童謠有好多個版本，可能鄉下唔同或者每家傳嘅唔一樣，有唔同嘅字句，無人知邊個先至係最早嘅版本；不過每個都有好玩過癮嘅地方，所以唔需要深究邊個係正统。

借用網上某博主嘅話，呢啲童謠大概分為兩類；一類係媽媽哄細路仔瞓覺啲呢喃語；另一類係細路仔玩嘅時候嘅戲謔語。前者温馨，後者調皮，都趣味盎然。讀呢啲童謠另一種樂趣來自細嚼箇中用語嘅語言。童謠大多用口語同俚語，雖然粗俗的，但簡單直接，無矯扭做作，所以有強大生命力。當然童謠裏嘅世界已距離我地好遠。而家細路仔唔會玩掟石頭，拋手巾，掟仙等洪荒時代嘅玩戲，亦無種田、田基、看牛、燒柴煮飯、大頭綠衣(警察)嘅事物；但呢啲係我地老一輩童年見到嘅嘢，講嘅廣東話。相對今日啲潮語、網語、Emoji等，仍覺得特別道地親切。下面係收集到嘅兒歌同童謠。

唔知而家啲媽咪唱乜嘢歌哄細路呢？

兒歌


1. 有隻雀仔跌落水

有隻雀仔跌落水，跌落水，跌落水，有隻雀仔跌落水，被水沖去。


2. 打開蚊帳

打開蚊帳，打開蚊帳，〔1〕有隻蚊，有隻蚊，快啲攞把扇嚟，快啲攞把扇嚟，撥咗佢，撥咗佢。
〔2〕有隻豬，有隻豬，快啲攞把刀嚟，快啲攞把刀嚟，劏咗佢，


3. 搖搖搖

搖搖搖，搖到外婆橋，外婆說我好寶寶，糖一包，果一包，少吃滋味多，多吃滋味少。

4. 月光光

月光光，照地堂，蝦仔你乖乖瞓落牀。聽朝阿媽要趕插秧咯，亞爺看牛要上山坡，哦哦哦...。蝦仔你快高長大咯，幫手亞爺去看牛羊，哦哦哦...。
月光光，照地堂，蝦仔你乖乖瞓落牀，聽朝亞媽要捕魚蝦咯，亞嫲織網要織到天光，哦哦哦...。蝦仔你快高長大咯，撐艇撒網就更在行，哦哦哦...。
月光光，照地堂，蝦仔你乖乖瞓落牀。

5. 三更天

初更天，常思妙，昨晚媽媽問乜叫，貓兒(衣音)叫，貓兒點樣叫，貓兒妙妙妙妙咁樣叫；二更天，常思妙，昨晚媽媽問乜叫，狗仔叫，狗仔點樣叫，狗仔WoWoWoWo咁樣叫；三更天，常思妙，昨晚媽媽問乜叫.............. ；四更天，常思妙，.............. ；五更天，常思妙，............. 。

6. 小朋友

小朋友快來跳舞，你的雙手拖住我，腳點地，轉過去，跑過來也跑過去。請你的頭搖搖搖，請你的腳踏踏踏。脚點地，轉過去，跑過來也跑過去。

7. 抗戰歌

小朋友，小朋友，大家牽着手。腳踏腳步，握緊小拳頭。大家一心，向前衝出去。要救同胞，不做忘國奴。



廣東話童謠

1. 月光光，照地堂；年卅晚，摘檳榔；檳榔香，摘子薑；子薑辣，買蒲達；蒲達苦，買豬肚；豬肚肥，買牛皮；牛皮薄，買菱角；菱角尖，買馬鞭；馬鞭長，起屋樑；屋樑高，買張刀；刀切菜，買籮蓋；籮蓋圓，買隻船；船浸底，浸親兩個番鬼仔；一個蒲頭，一個沉底；〔1〕一個摸茨菇，一個摸馬蹄。
〔2〕仲有一個匿埋牀下底，煮飯仔。

2. 凼凼轉，菊花園；炒米餅，糯米團；亞媽佢叫我去睇龍船；我唔睇，睇雞仔；雞仔大，拎去賣，〔1〕賣咗幾多錢，賣得三百文錢。一百打金釵，一百打銀牌。金腰帶，銀腰帶，請亞婆婆出嚟拜一拜；拜得多，無奈何，三酲燒酒兩隻鵝。
〔2〕賣咗幾文錢，我買隻風車仔，佢轉得好好睇，睇佢凼凼轉啊菊花園，睇佢凼凼轉啊凼凼轉啊轉。

3. 點蟲蟲，蟲蟲飛，飛到荔枝基；荔枝熟，〔1〕摘滿屋；屋滿紅，伴住個細蚊公。
〔2〕冇埞伏，伏去個鼻哥窿。

4. 又喊又笑，烏蠅打醮，蠄蟧攋尿，老鼠行橋。
〔亦有加〝貓兒(衣音)偷笑〞。〕

5. 排排坐，食粉果；豬拉柴，狗透火；貓兒擔凳姑婆坐；〔1〕坐埋一齊唱支歌。
〔2〕坐爛屎窟唔好賴我，賴番隔籬二叔婆。


6. 落大雨，水浸街，〔1〕亞哥擔柴上街賣，亞嫂出街著花鞋，花鞋花襪花腰帶，珍珠蝴蝶兩邊排，排排都有十二粒，粒粒圓亮冇疵瑕。〔最後两句有用〝有錢打對鈴琳鼓，冇錢打個石榴牌。〞〕
〔2〕亞哥擔柴上街賣，細佬落地着花鞋，花鞋花襪花腳帶，天光冇雨去行街。


7. 拍大脾，唱山歌，人人話我冇老婆，的起心肝娶翻個，有錢娶個嬌嬌女，冇錢娶個痘皮婆，〔1〕痘皮婆，食飯食得多，屙屎屙兩籮，屙尿沖大海，屙屁打銅鑼。
〔2〕一粒痘皮三分貴，冇粒痘皮賤過泥。

8. 賣懶去，買精歸，賣左懶仔過新年，食過年飯好種田。

9. 賣懶，賣懶，賣到年三十晚，人懶我唔懶。

10. 雞公仔，尾婆娑，三歲孩兒學唱歌；唔使爹娘教導我，自己精乖無奈何。

11. 曖姑乖，曖姑乖，曖大姑乖嫁後街，後街有鮮魚鮮肉賣，又有鮮花戴，戴唔哂，擺落牀頭畀老鼠拉，拉拉拉，〔1〕拉去大新街，大新街又有個扯皮鞋，扯下開，又扯下埋。
〔2〕拉咗姑仔對爛皮鞋。

12. 雞公仔， 尾彎彎， 做人新抱甚艱難。早早起身都有話晏， 眼淚唔乾入下間。 下間有個冬瓜仔， 問過安人煮定蒸。安人話煮，老爺又話蒸，蒸蒸煮煮唔中意。大揸落鹽仲話淡， 手甲挑鹽又話鹹。三朝打爛三轆棍。橫又難，直又難，不如捨命落陰間。人話陰間條路好，我話陰間條路甚艱難。 

13. 呈尋剪，呈尋包，呈尋糯米(或磨絞)叉燒包。老鼠唔食香口膠，要食豆沙包。

14. 點指兵兵，點指賊賊，點著誰人做大兵，點著誰人做大賊。

15. 何家猜，何家猜，何家小雞何家猜，何家公雞何家猜，何家母雞喔喔喔，猴子哥哥熊先生，松鼠妹妹牛叔叔，黃狗爸爸羊媽媽，來猜來猜唷。

16. 估手指，要估中，邊個唔中，就唔中用，褲浪底見個窿。

17. 騎牛牛，牛牛走，牛牛響前咪回頭，若然回頭就打籮柚。

18. 大眼雞，鹹魚頭，你屙尿，唔洗手。

19. 瀨尿蝦，煮冬瓜，煮唔熟，賴阿媽。

20. 大笨象，揸支槍，去打仗，〔1〕打完仗，翻嚟食碗辣椒醬。
〔2〕打唔嬴，翻嚟食碗辣椒醬。
 仲有在最前面加上〝揼啄，紫薑，吹唔漲，掹唔長〞

21. 揼揼啄啄，椰子夾酸薑，雞蛋煲茶十五樣，〔1〕問你香唔香。
〔2〕又擔旗又擔桿，紅毛火水醃完薑，醃完一件又一件。

22. 行、行、行，行到街邊執個橙，橙好食，路好行。

23. 肥佬肥騰騰，買嚿豬肉去拜神，行到半路屎窟痕，返到屋企〔1〕冇晒人。〔2〕瓜老襯

24. 煮飯仔，先落米，風爐透火柴對齊，千祈唔好咁揦西，我吔唔係細蚊仔。

25. 蘿蔔頭，點豉油，點得多，鹹過頭，點得少，淡茂茂。佢以為，好正斗，點不知，畀人踢籮柚，一踢踢到西門口。

26. 打掌仔，賣鹹魚，鹹魚淡，賣烏欖，烏欖甜，買個添，〔1〕甜甩牙，飲啖茶，茶又凍，買個屎瓮，屎瓮裡邊有條蟲，捐入鼻哥窿。
〔2〕人唔俾，揼地攞番錢，第度買，浸牙甜。

27. 細蚊仔，瀡滑梯，因住跌落嚟；咪學陳德貴，成日流鼻涕，跌親籮柚唔好睇。

28.  姑丈擔凳孩兒坐，孩兒坐落就劏雞。雞會劏前喔喔啼，不如劏只鴨；鴨又嫌鴨毛多，不如劏只鵝；鵝又嫌鵝頸長，不如劏只羊；羊又嫌羊腳叉，不如劏只馬；馬會送君出埗頭，不如劏只牛；牛會耕田養人口；不如劏只狗，狗有人嚟佢都知，不如劏只大貓兒；貓兒又會捉老鼠，不如劏只大肥豬；肥豬會食主人三斗祿，主人食佢三舊肥豬肉。

29. ABCD，大頭綠衣；捉人唔到，吹BB。

30. 咬蔗鬚，要睇毛，短毛輸，長毛贏，冇毛唔算數。

31. 搣開柑，數柑核，邊個核多就邊個贏，唔准手(?)賴就縮骨。

32. 轆銅仙，打銅錢，全憑眼界手出變(?)，叮響銅錢畀個仙。

33. 打泥炮，泥炮響，唔使揸槍上戰場。

34. 放紙鷂，麻鷹飛，飛嚟飛去唔落地，麻鷹飛起有條尾。

35. 趷跛跛，跛咗蹄，冇米煮，煮泥沙，冇屋住，住樓梯，樓梯有隻鬼，嚇到   你嗊落床下底。
36. 走得快，好世界，走得嚤，冇鼻哥。

37. 鬥遠掟石頭，因住咪甩手，石頭最冇眼，掟親唔好眼淚流。

38. 掟磚頭，鬥大嚿，一掟掟到西門口，濺起浪花拋浪頭。


39. 隔籬屋企燒炮仗，問你響唔響，唔響掌你兩巴掌。

40. 我有幾文雞，過年買隻雞，隻雞好好食，夾畀阿媽食，阿媽話我乖，帶我   行花街。

41. 大吓細，畀屎喂；細吓大，〔1〕冇所謂。〔2〕畀尿淋。

42. 為食鬼，砧板蟻，人咁高，你咁矮。

43. 河邊有隻羊，羊邊有隻象，象邊有隻馬騮仔，好似你噉樣。

44. 大苯象會跳舞，馬騮仔會上樹。

45. 花手巾，真引人，基邊撈魚好過癮，一兜一條好手運，千祈唔好踎到你頭暈。

46. 黐塘咪(即蜻蜓)，塘咪飛，飛到菜田基，田基有條蛇，嚇親你兩仔爺。

47. 豬婆婆，賣菠蘿，賣畀地主做老婆。地主唔要佢，一腳將佢踢落河，執翻上嚟暈酡酡。

48. 講大話，甩大牙。

49. 食嘢唔做嘢，做嘢打爛嘢。

50. 醜醜丑、醜醜丑，丑甩耳仔送燒酒。

51. 一人騎膊馬，兩人騎豬乸，三步要埋頭，撞到面就打。

52. 紅辣椒，綠辣椒，平時你牙擦嘴藐藐，今日你冇膽同我撩。

53. 鬼叫你咁貪心，聞咗我個屁，嗍咗入個鼻，我要你賠翻二兩四。

54. 昧水底，摸泥沙，摸到泥沙當金龜，摸唔到，喺契弟。

55. 陳德貴，住得矮，床下底有隻鬼，嚇到摃抬底。

56. 伸長手，頂手掌，死人都要頂硬上，依牙嘣哨就貓噉樣。

57. 一二三，三二一，肥婆跳舞頂第一。

58. 黑面李逵，紅面關公，三國水滸亂哂龍，打敗清兵系英雄。

59. 乞兒仔，畫烏龜，一人一筆咪亂嚟，最後嗰個正衰仔！

60. 肥仔個頭，大過五層樓，肥仔隻手，細過荷蘭豆。

61. 童子軍，食雲吞，打爛碗，賠十蚊，冇得賠，賠碌棍。

62. 恭喜你，恭喜你，講嘢都會蛤着脷，放學唔識返屋企，年年考試考第尾。

63. 肥婆學揸車, 啤 啤……… (藍色多惱河調)



東莞童謠

食飽飯，睇頭棚；好睇睇到二三更，唔好睇就番；三百六錢買個鹹鴨蛋，跌落坑渠〝辦〞，摸來摸去摸唔番。

石龍童謠

水滴滴，水流流，流到水南頭；水南頭XXXXXXX，有白石青磚起門樓。